Biliwal.com betidin elindi.

@Gheni Abla: Arimizdin ciqqan bu hil hormetke sazawer kishilerni
eslesh zorur dep qarighanlighim ucun ruhsitingizsiz caplap qoydum.

#######################

Abdusalam Hoshurni Esleymen

Abdusalam Hoshur 1963-yili 3-ayda Kuchada tughulghan, 2005-yili 2-ayda
késel sewebi bilen Kuchada wapat boldi. Abdusalam Hoshur bashlan'ghuch
we ottura mekteplerni Kuchada tamamlighan. U 1981-yildin
1985-yilghiche Dalien Sana'et Institutida Oqughan. U 1986-yilidin
2005-yili 2-ayghiche, "Aptonom Rayonluq Uchur Téxnikisini Kéngeytish
Ishxanisi" da xizmet qilghan. Kompyutér kespide oqughan tunji ewlad
Uyghurlarning biri bolush süpiti bilen, Aptonom Rayonning kompyutér
ishlirining yüksilishi, bolupmu Uyghurlar arisida kompyutér
téxnikisining omumlishishigha köp töhpilerni qoshqan. U Aptonom Rayon
tarixidiki tunji kompyutér rémontxanisining qurghuchisi (1987-1992
yillar), Uyghur tilida échilghan tunji kompyutér kursi
oqutquchilirining biri (1988-yil), Uyghur tilida élin'ghan "Aptonom
Rayonluq Kompyutér Meshghulatchiliri Imtahani" (5-6 yil jeryanida
nechche onming adem qatnashqan) ning teshkilligüchisi, tunji kompyutér
téléwiziye sin'alghu derslikining teshkilligüchisi...dégendek
ehmiyetlik xizmetliri bilen kompyutér jama'etchilikige tonushluq idi.
U yene kompyutér sahesidiki muhim tetqiqat türliri we qurulush
türliridin birnechchisige qatnashqan. Ilgiri-kéyin bolup u "Aptonom
Rayonluq Kompyutér Qollinish-Kéngeytish Merkizi" ning bashliqi,
"Aptonom Rayonluq Kompyutér Xadimlirini Terbiyelesh Merkizi" ning
bashliqi we "Aptonom Rayonluq Uchur-Téxnika Institutining" mektep
mudiri qatarliq rehberlik xizmetlirini ötigen. U hayat waqtida özining
kespiy bilimi we rehberlik iqtidari bilen kompyutér we uchur téxnika
saheside közge körün'gen jama'et erbabi idi.

Mana hesh-pesh digüche akimiz, dostimiz we xizmetdeshimiz Abdusalam
Hoshur (ALLAH yatqan yérini jennet qilghay) ning arimizdin waqitsiz
ketkinigimu yérim yildek bolup qaldi. Jushqunluq, pidakarliq,
köyümchanliq, arzu-arman we adimiy prinsiplar bilen aldirashchiliq
ichide ötüwatqan bir hayatning rehimsiz késel teripidin tosattin
üzülüp qalghanliqini deslepte qobul qilalmighan bolsaqmu, waqitning
ötüshi bilen u kishidin heqiqeten ayrilghanliqimizgha ten bérishke
mejbur boluwatimiz.

Abdusalam bilen men uzun yil bir idaride xizmet qilghan, dost bolghan,
bir-birimizni köp chüshinishken, emeliyette aka-ukidek ötüshken iduq.
Shu sewebtinmu uning hayatining xéli köp qismigha guwahchi bolghan
idim. Men shu tarixtin qélip qalghan eslimilirimni uning ailisi,
dostliri, tonush-bilishliri shundaqla uning qolida oqughan
oqughuchiliri bilen ortaqlishishni muwapiq kördum.

Abdusalam kishilerge köp yardem qilatti. U kompyutér qattiq
détallirigha pishshiq bulup, Uyghur Rayonining birinchi ewlad
kompyutér remontchisi idi. 1990-yillarning bashlirida kompyutérlarmu
jiq buzilidighan bolghachqa, u nurghun idare we shexslerning
kompyutérlirini ongshaytti. Künde kechte dégüdek bir kompyutérning
yénigha bérip uni eyweshke keltüretti. Hérip ketsimu zarlanmaytti.

Abdusalam bek köp külüp ketmeytti. Ishlargha jiddiy, estayidil muamile
qilatti. Kishilerning uning qushumisining köp hallarda türüklük
turidighinidin datlan'ghini ésimde. Lékin hazir oylisam, u ehmiyetlik
ishlarghila külgen iken. Biz achqan kompyutér kurslirigha minglap
Uyghurlar kélip, Uyghur Rayonining yuqiri tetqiqat orni hisablan'ghan
"Penler Akadémiyisi" ning derwazisidin top-topi bilen Uyghur
oqughuchilar kirgen, zallirida yüzlep Uyghur oqughuchi oqughan,
Abdusalamning milliylargha kompyutér omumlashturush tirishchanliqi
méwe bergen chaghda, u échilip külgen idi. Guruppimiz Yurungqash
boyliridiki yézilarda nechche ay kéche-kéchilep programma yézip, kabél
tartip "Paxta Sétiwélish Tor Sistémisi" ni barliqqa keltürgendin
kéyin; Déhqanlarning paxta sétish üchün tonurdek aptapta nöwet
saqlaydighan waqti qisqarghanda; Uyghur déhqanlar kompyutér
téxnikisining paydisini tunji qétim hés qilip, bizning qollirimizni
siqip "rehmet" dégende; U hozurlinip külgen idi.

Abdusalam ademlik prinsiplirida ching turidighan, yolsizliq
qilghanlargha emeliy we millitige qarimay del waqtida zerbe
béreleydighan kishi idi. Shungimu u qeyerge barsa shu yerde tézla
"emeliyettiki rehber" bolup közge körünetti. Qilghan ishliri daim
netijilik bolatti.

Abdusalam prinsipta ching turghan bilen u kishilerni
kechürüwételeytti, adawet saqlimaytti. Birersi bilen toqunush bolsa, u
tézla untup kétetti. Kim bolsimu yardemge muhtaj bolsila qolidin
kélishiche yardem qilatti.

Abdusalam tirishchan adem idi. U daim yéksek pilanlarni tüzetti,
pilanlirini emelge ashurush üchün tirishatti we qilghan emgeklirining
netijisini sewrchanliq bilen kütetti.

Abdusalam millet ishlirigha köyünetti. Millitimizning yüksilishi,
ademlirimizning kespiy sapasining bashqilardin éship chüshüshige hesse
qoshushni özining uzun muddetlik pilani qilghan idi.

Abdusalam bir yaxshi ata idi. U ayali Tursun'gül we birdin-bir qizi
Nadire (bu yil alte yashqa kirdi)ge bekmu köyünetti. Men her qétim
héyt-ayemlerde téléfon urghan waqtimda, özining qizini qandaq
terbiyelewatqanliqi, uni chet ellerde oqutush pilanlirinining
barliqini déyishni unutmaytti. Men gerche téxi yeslidiki qizchaq üchün
aliy mektep pilanlirini tüzüshni sel burun dep hés qilsammu, uning
perzenti üchün qanchilik ulugh we semimiy pilanlirining barliqini
chüshinip yetken idim.

Men bu eslimemni George Bernard Shawning "Hayatning Heqiqiy
Xushalliqi" toghriliq éytqan töwendiki meshhur sözliri bilen
ayaqlashturimen:

" Men hayatim énérgiyisini men wapat bolghan'gha qeder toluq ishlitip
bolmaqchimen. Qanche köp ishliyelisem, shunche uzun yashighan bolimen.
Men meqsetlik hayatim bolghanliqidin xushalmen.
Hayat men üchün yénip öchidighan sham emes, belki u yalqunjighan
mesh'elki, men uni qisqa waqitla tutup turalaymen. Shundaq bolghan
iken, men uni ewladlargha tapshurup bérishtin burun qurbumning
yétishiche uni nurlandurimen"

Abdusalamning hayati gerche waqit jehettin qisqa bolsimu, lékin
nahayiti ehmiyetlik ötken hayat boldi.

--Gheni Abla
2005-yili 7-ay, Kaliforniye